"an kamot nin karpintero"

"An karpintero daa mayong sadiring harong"
an dinakulaan kong tataramon..sa pagmati ko kaidto ini sarong insulto nin huli ta an ama ko sarong pusikit na karpintero..alagad kan ako nagtatalubo na asin naghihiwas naman kadikit an pag- isip sako na ining nasabutan..totoo manangad na an sarong karpintero mayo nin sadiring harong, kun igwa man ini dai tapos.
An lolo ko saro man na karpintero asin siring man an saiyang ama na minana man kan sakuyang ama..Segun sa istorya kan sakong ama, si "Lolong Poloy" saro man sa bistadong karpintero sa Garchitorena kan kapanahunan niya, malinig mag trabaho, matibay gumibo nin lantsa, minsan ngani di layag pa sana an uso kaidto.."Paraw" an apod ninda kan barutong di layag na pwedeng kumarga nin sagkod sa singko tonelada (5tons). Agod niya man gumibo nin "Kasko"(an baruto na permi tang nahihiling sa salog kan Naga pagpanahon nin Kapistahan). Alagad an saindang harong dai tapos, dai kumpleto an Kusina nin huli ta mau lamang ini nin aparador na bugtakan nin mga malinig nang plato..
An harong na ini minana kan "Lolo Erning" ko na karpintero man, alagad sagkod na siya huminali sa Bikol tanganing mag istar sa Isla kan Polilio ini dai natapos.
Sa madaling istorya, an panduwang aki ni Lolo Erning na iyo na ngani an sakong ama nakanuod man kan pagpanday. Alagad ini (harong) dai na lamang nahiro sagkod na ini ipabakal na sana kan Lola Nita mi na agom ni Lolong Poloy.
Si "Atet", an apod kan kadaklan sa sakong ama an solamenteng nakanuod magpuropanday sa limang lalaking aki ni Lolo Erning. Tatao na man siya gumibo nin baruto na di sagwan, di layag minsan ngani an di makinang lantsa na minabiyahe nin Garchitorena pasiring Tamban asin Tabaco nagkapira naman nahaman niya. Alagad siring sa saiyang Lolo asin Ama an harong niya dai man tapos.
Alagad an sakong ama dai nanggad minauntok sa pagprubar na mahaman an samong rugaring.
May saro siyang tataramon na binutasan sa samong magturugang " Ako mahinguha na kamo makatarapos sa pagaradal tangani man na ako makaistar sa sarong harong na haman". Nagturo an sakong luha mantang nagtataram siya kan siring na tataramon. Sako ining na-reyalisar na kun tano ta an karpintero mayo nin haman o sadiring harong.
Enot, kaipuhan niya maghanapbuhay para sa pangangaipo kan saiyang pamilya,ikaduwa, kulang man an nakukua niyang suweldo tangani na siya makabakal nin materyales na kakaipuhanon niya sa sadiring erokan.
Kaya man sana an saiyang paghinguha asin paghigos kasurog an pangataman kan samong ina binabalusan mi ini nin maray na pagtrato sainda. An kamot na ini kan sarong karpintero naghinguwa na matabangan an saiyang mga aki asin pirit na tinitios an kapagalan, an tanglay kan igsan (habayan) asin takyag dai na sana minamati tangani sanang maitao an pangangaipo kan saiyang mga aki na nag-aaradal.
An paghigos kan karpinterong si Atet may duwa nang aki na napatapos sa kolehiyo asin may tulong aking daraga na nag iiskuwela pa sa kolehiyo. Alagad siya dai pa nanngad nag- uuntok nin huli ta an saiyang harong dai pa nahahaman.
An martilyo, katam, tigib, eskwala, hulog, alapres asin kun ano ano pang gamit sa pagkakarpintero iyo an naging kasurog kan mga karpintero sa paghinguha na mabuhay asin matabangan an saindang mga pamilya. Sa tabang kan satong Mahal na Diyos na iyo an minatao sainda nin kusog iyo man an minagiya sainda tangani sana na sinda maparayo sa katibaadan asin pag alaman.
Sarong pag omaw an boot kung itao sa gabos na karpintero!..nin huli ta kung bakong huli sainda mayo kita nin harong na masusulukan.
AMA, PARA INI SAIMO..

melqui arcilla